പാലക്കാട് ചിറ്റൂര്‍ പുഴയില്‍ കുടുങ്ങിയ കുട്ടികളെ രക്ഷപ്പെടുത്തി

പാലക്കാട് ചിറ്റൂര്‍ പുഴയില്‍ കുളിക്കാനിറങ്ങിയ രണ്ടു കുട്ടികളാണ് പുഴയുടെ നടുക്ക് കുടുങ്ങിയത്. ചിറ്റൂര്‍ അഗ്‌നിരക്ഷാ സേനയുടെയും പോലീസിന്റെയും നേതൃത്വത്തില്‍ ഏണിയിറക്കി നല്‍കിയാണ് കുട്ടികളെ കരയ്‌ക്കെത്തിച്ചത്. മൂന്നു കുട്ടികളാണ് പുഴയില്‍ കുളിക്കാനിറങ്ങിയത്. വെള്ളം ഉയര്‍ന്നതോടെ ഒരാള്‍ നീന്തി കരയിലേക്ക് കയറി നാട്ടുകാരെ വിവരം അറിയിക്കുകയായിരുന്നു. കഴിഞ്ഞ ദിവസം നാലംഗ കുടുംബം അപകടത്തില്‍പ്പെട്ട സ്ഥലത്തിന് സമീപമാണ് കുട്ടികള്‍ കുടുങ്ങിയത്.

Kerala287 days ago

കുട്ടികൾ സോഷ്യൽ മീഡിയ ഉപയോഗിക്കുന്നതിന് പ്രായപരിധി ഏർപ്പെടുത്താനൊരുങ്ങി ഓസ്‌ട്രേലിയ

കുട്ടികള്‍ സോഷ്യല്‍ മീഡിയ ഉപയോഗിക്കുന്നതിന് കുറഞ്ഞ പ്രായപരിധി ഏര്‍പ്പെടുത്തുന്നതിനായി ഈ വർഷം നിയമനിർമാണം നടത്തുമെന്ന് ഓസ്‌ട്രേലിയൻ ഗവൺമെന്റ്. എന്നാൽ പ്രായം എങ്ങനെ പരിശോധിക്കുമെന്ന് ഇതുവരെ പ്രഖ്യാപിച്ചിട്ടില്ല. കുട്ടികളുടെ പ്രായം സ്ഥിരീകരിക്കുന്നതിനായി സർക്കാർ കൊണ്ടുവന്ന സാങ്കേതിക വിദ്യ ഉടന്‍ പരീക്ഷിക്കുമെന്ന് പ്രധാനമന്ത്രി ആന്റണി അല്‍ബാനീസ് പറഞ്ഞു. 14,15,16 എന്നീ വയസുകളിലേതെങ്കിലുമായിരിക്കും പ്രായപരിധിയായി നിശ്ചയിക്കുക. സോഷ്യല്‍ മീഡിയ വഴി കുട്ടികളെ ഉപദ്രവിക്കുകയും ഭീഷണിപ്പെടുത്തുകയും ചെയ്യുന്നത് പൂര്‍ണമായും ഇല്ലാതാക്കുന്നതിന് വേണ്ടിയാണ് ഇത്തരത്തിലൊരു നിയമ നിര്‍മാണനത്തിന് തയ്യാറെടുക്കുന്നത്.

World235 days ago

കുട്ടികളുടെ യൂട്യൂബ് ഉപയോഗത്തില്‍ രക്ഷിതാക്കള്‍ക്ക് ശ്രദ്ധിക്കാം; പുതിയ ഫീച്ചര്‍ എത്തുന്നു

കുട്ടികളുടെ യൂട്യൂബ് അക്കൗണ്ടിനെ സ്വന്തം അക്കൗണ്ടുമായി രക്ഷിതാക്കള്‍ക്ക് ബന്ധിപ്പിക്കാനാകുന്ന ഫീച്ചറാണ് ഗൂഗിള്‍ അവതരിപ്പിച്ചിരിക്കുന്നത്. കുട്ടികള്‍ യൂട്യൂബില്‍ എന്തെല്ലാം കാാണുന്നു, എത്ര വീഡിയോകള്‍ അപ്ലോഡ് ചെയ്യുന്നു, ഏതെല്ലാം ചാനലുകള്‍ സബ്സ്‌ക്രൈബ് ചെയ്തിട്ടുണ്ട്, പോസ്റ്റ് ചെയ്യുന്ന കമന്റുകള്‍ ഉള്‍പ്പടെയുള്ള വിവരങ്ങള്‍ പുതിയ ഫീച്ചര്‍ വഴി രക്ഷിതാക്കള്‍ക്ക് എളുപ്പം മനസിലാക്കാം. കുട്ടികള്‍ ഒരു വീഡിയോ അപ്ലോഡ് ചെയ്യുമ്പോഴും സ്ട്രീമിങ് ആരംഭിക്കുമ്പോഴും ഇ-മെയില്‍ വഴി രക്ഷിതാക്കള്‍ക്ക് മെസെജുമെത്തും.

Technology237 days ago

എറണാകുളം – ഷൊര്‍ണൂര്‍ ലൈനില്‍ ‘കവച്’ സുരക്ഷാസംവിധാനം നടപ്പാക്കും

ഓട്ടോമാറ്റിക് സിഗ്നലിങ്ങിന് ഒപ്പമാണ് 'കവച്' സുരക്ഷാസംവിധാനവും നടപ്പാക്കുന്നത്. രണ്ട് തീവണ്ടികള്‍ ഒരേ പാതയില്‍ നേര്‍ക്കുനേര്‍ വന്ന് കൂട്ടിയിടിയ്ക്കുന്നത് ഒഴിവാക്കുന്നതിനുള്ള സാങ്കേതിക സംവിധാനമാണ് കവച്. 67.99 കോടി രൂപ മതിപ്പ് ചെലവിലാണ് പദ്ധതി നടപ്പാക്കുക. 540 ദിവസമാണ് പദ്ധതി പൂര്‍ത്തീകരണത്തിനുള്ള കാലാവധിയായി കണക്കാക്കിയിരിയ്ക്കുന്നത്. ഇതോടെ കേരളത്തില്‍ ആദ്യമായി കവച് സംവിധാനം നടപ്പിലാക്കുന്ന മേഖലയായി എറണാകുളം - ഷൊര്‍ണൂര്‍ ലൈന്‍ മാറും.

Kerala239 days ago

KTDC ചെയര്‍മാന്‍ സ്ഥാനത്തുനിന്ന് പി.കെ. ശശിയെ നീക്കണമെന്ന് CPI(M) പാലക്കാട് ജില്ലാ സെക്രട്ടറിയേറ്റ്

ഫണ്ട് ക്രമക്കേടുകൾ അടക്കം ഗുരുതര ആരോപണങ്ങളെ തുടർന്ന് പാർട്ടി നടപടി നേരിട്ട പി.കെ. ശശിയെ KTDC ചെയര്‍മാന്‍ സ്ഥാനത്തുനിന്നു മാറ്റണമെന്ന് CPI(M) പാലക്കാട് ജില്ലാ നേതൃത്വം. ശശിയെ CITU ജില്ലാ പ്രസിഡന്റ് പദവിയിൽ നിന്ന് ഒഴിവാക്കണമെന്നും ആവശ്യം ഉയരുന്നുണ്ട്. ഇക്കാര്യം ചൂണ്ടിക്കാട്ടി ജില്ലാ കമ്മറ്റി സംസ്ഥാന നേതൃത്വത്തിന് കത്ത് നൽകി. വിവിധ ആരോപണങ്ങളെ തുടർന്ന് പി.കെ. ശശിയെ ജില്ലാ കമ്മിറ്റിയിൽ നിന്നും ബ്രാഞ്ചിലേക്ക് തരംതാഴ്ത്തിയിരുന്നു.

Kerala242 days ago

3,806 കോടി മുതല്‍ മുടക്ക്; പാലക്കാട് വ്യവസായ സ്മാര്‍ട്ട് സിറ്റി സ്ഥാപിക്കാന്‍ കേന്ദ്രം

പാലക്കാട് വ്യവസായ സ്മാര്‍ട്ട് സിറ്റി സ്ഥാപിക്കാന്‍ കേന്ദ്ര സര്‍ക്കാര്‍ തീരുമാനം. നാഷണല്‍ ഇന്‍ഡസ്ട്രിയല്‍ കോറിഡോര്‍ ഡെവലപ്‌മെന്റ് പ്രോഗ്രാമില്‍ പ്രഖ്യാപിച്ച 12 ഇന്‍ഡസ്ട്രിയല്‍ സ്മാര്‍ട്ട് സിറ്റികളിലൊന്നായാണ് പാലക്കാട് പുതുശ്ശേരി വരുക. 3,806 കോടി മുതല്‍ മുടക്കില്‍ കൊച്ചി- സേലം പാതയിലാണ് വ്യവസായ നഗരം സ്ഥാപിക്കുക. 1710 ഏക്കറില്‍ ഒരുങ്ങുന്ന പദ്ധതിയിലൂടെ 51,000 ഓളം തൊഴിലവസരങ്ങളാണ് സൃഷ്ടിക്കുക. പ്രധാനമന്ത്രിയുടെ അധ്യക്ഷതയില്‍ ചേര്‍ന്ന കേന്ദ്ര മന്ത്രിസഭായോഗത്തില്‍ കേന്ദ്രമന്ത്രി അശ്വിനി വൈഷ്ണവാണ് പദ്ധതിക്ക് അനുമതി നല്‍കിയത്.

Kerala248 days ago

മൂന്ന് വയസ്സുള്ള പെണ്‍കുട്ടികള്‍ക്ക് നേരെ ലൈംഗികാതിക്രമം; താനെയില്‍ പ്രതിഷേധം

പ്രീപ്രൈമറി ക്ലാസില്‍ പഠിക്കുന്ന മൂന്ന് വയസ്സുള്ള പെണ്‍കുട്ടികളെ ലൈംഗികാതിക്രമത്തിനിരയാക്കി സംഭവത്തില്‍ താനെയില്‍ പ്രതിഷേധം ശക്തമാവുകയാണ്. പ്രതിഷേധക്കാര്‍ ബദലാപൂര്‍ റെയില്‍വേ സ്റ്റേഷനില്‍ ലോക്കല്‍ ട്രെയിനുകള്‍ തടഞ്ഞു. സ്‌കൂളിലെ ടോയ്‌ലെറ്റില്‍ വെച്ച് ശുചീകരണ തൊഴിലാളിയാണ് കുട്ടികളെ ലൈംഗികാതിക്രമത്തിന് ഇരയാക്കിയത്. സംഭവത്തില്‍ പ്രതിയെ അറസ്റ്റ് ചെയ്തു. കേസിന്റെ വിചാരണക്കായി അതിവേഗ കോടതി സ്ഥാപിക്കുമെന്ന് മഹാരാഷ്ട്ര മുഖ്യമന്ത്രി ഏക്‌നാഥ് ഷിന്‍ഡെ പറഞ്ഞു.

National256 days ago

വയനാട്, കോഴിക്കോട് ജില്ലകൾക്ക് പുറമെ പാലക്കാടും പ്രകമ്പനം

വയനാട്, കോഴിക്കോട് ജില്ലകളിലെ വിവിധയിടങ്ങളിൽ നിന്ന് പ്രകമ്പനം ഉണ്ടായതിന് പിന്നാലെ പാലക്കാടും വിവിധ പ്രദേശങ്ങളിൽ ഭൂമിക്കടിയിൽ നിന്ന് മുഴക്കമുണ്ടായി. ഒറ്റപ്പാലം താലൂക്ക് പരിധിയിലെ ചളവറ, പുലാക്കുന്ന്, ലക്കിടി, അകലൂർ, പനമണ്ണ, കോതകുർശ്ശി, വാണിയംകുളം, പനയൂർ, വരോട്, വീട്ടാമ്പാറ പ്രദേശങ്ങളിലാണ് അസാധാരണ ശബ്ദമുണ്ടായതായി നാട്ടുകാർ പറഞ്ഞത്. രാവിലെ ശബ്ദം കേട്ട ശേഷം പ്രദേശത്ത് മറ്റ് പ്രകമ്പനങ്ങളോ അസാധാരണ ശബ്ദങ്ങളോ ഉണ്ടായിട്ടില്ലെന്നും നാട്ടുകാർ പറഞ്ഞു. സംസ്ഥാനത്തുണ്ടായത് ഭൂചലനമല്ലെന്നാണ് നാഷണൽ സീസ്മോളജി സെന്റർ സ്ഥിരീകരിച്ചിട്ടുള്ളത്.

Kerala267 days ago

സംസ്ഥാനത്ത് വീണ്ടും കര്‍ഷക ആത്മഹത്യ

പാലക്കാട് നെന്മാറ ഇടിയംപൊറ്റ സ്വദേശി സോമന്‍ ആണ് ജീവനൊടുക്കിയത്. മൃതദേഹത്തിനടുത്ത് നിന്ന് ആത്മഹത്യാക്കുറിപ്പ് കണ്ടെത്തി. കൃഷി നശിച്ചുവെന്നും വായ്പാ തിരിച്ചടവ് മുടങ്ങി എന്നുമാണ് ആത്മഹത്യാക്കുറിപ്പില്‍ എഴുതിയിരുന്നത്. സ്വന്തം ഭൂമിയിലും പാട്ടത്തിനെടുത്ത ഭൂമിയിലും നെല്‍ കൃഷി ചെയ്ത് വരികയായിരുന്ന സോമനെ ഇന്ന് പുലര്‍ച്ചെ വീടിനു മുന്നിലെ മരത്തില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു.

Kerala268 days ago

പട്ടാമ്പി പാലം നാളെ മുതൽ തുറന്നു കൊടുക്കും

കനത്തമഴയെ തുടർന്ന് വെള്ളത്തിൽ മുങ്ങിയ പട്ടാമ്പി പാലം നാളെ മുതൽ ഗതാഗതത്തിനായി തുറന്ന് കൊടുക്കും. മഴയെ തുടർന്ന് ഉണ്ടായ വെള്ളക്കെട്ട് ഇറങ്ങിയപ്പോഴും പാലത്തിന്റെ കൈവരികൾ ഒഴുകിപ്പോയതും വാഹനഗതാഗതം നിർത്തലാക്കാൻ കാരണമായി. നിബന്ധനകൾക്ക് വിധേയമായാണ് പാലം തുറക്കുന്നതെന്ന് പാലക്കാട് ജില്ലാ കളക്ടർ അറിയിച്ചു. ഒരു സമയം ഒരു ഭാഗത്തേക്കുള്ള വാഹനങ്ങൾ മാത്രം കടത്തി വിടണമെന്നും പാലത്തിന് മുകളിൽ ആവശ്യമായ സുരക്ഷ ഒരുക്കാനും നിർദേശം നൽകി.

Kerala270 days ago

ജലനിരപ്പ് ഉയരുന്നു; മലമ്പുഴ ഡാമിന്റെ ഷട്ടറുകൾ തുറക്കാൻ സാധ്യത

ജലനിരപ്പ് ഉയരുന്ന സാഹചര്യത്തില്‍ മലമ്പുഴ അണക്കെട്ടിന്‍റെ ഷട്ടര്‍ രണ്ടോ മൂന്നോ ദിവസത്തിനുള്ളിൽ ഉയർത്തേണ്ടി വരുമെന്ന് മുന്നറിയിപ്പ്. അതിനാൽ പ്രദേശവാസികള്‍ ജാഗ്രത പാലിക്കണമെന്ന് അധികൃതര്‍ അറിയിച്ചു. ഡാമിന്റെ വൃഷ്ടി പ്രദേശത്ത് 38.4 മില്ലി മീറ്റർ അളവിലാണ് മഴ ലഭിക്കുന്നത്. ഡാമിലേക്ക് 40.8 m3/s എന്ന നിലയിലാണ് നീരൊഴുക്ക്. ഇതേ നില തുടരുകയാണെങ്കിൽ രണ്ടു മൂന്നു ദിവസത്തിനുള്ളിൽ റൂൾ കർവ് അനുസരിച്ചുള്ള ജലനിരപ്പ് എത്താൻ സാധ്യതയുണ്ടെന്നും ഷട്ടറുകൾ തുറക്കേണ്ടി വരുമെന്നും എക്സിക്യൂട്ടീവ് എന്‍ജിനീയര്‍ അറിയിച്ചു.

Kerala275 days ago