ആലപ്പുഴയിലെ നവജാതശിശുവിന്റെ മരണം: കുഞ്ഞു ജനിച്ചപ്പോൾ കരഞ്ഞെന്ന് യുവതി പറഞ്ഞിരുന്നുവെന്ന് ഡോക്ടർ

ആലപ്പുഴയിലെ നവജാതശിശുവിന്റെ മരണത്തിൽ നിർണായക വഴിത്തിരിവ്. കുഞ്ഞു ജനിച്ചപ്പോൾ കരഞ്ഞിരുന്നു എന്ന് യുവതി തന്നോട് പറഞ്ഞിരുന്നുവെന്ന് യുവതിയെ ചികിത്സിച്ച ഡോക്ടർ മൊഴി നൽകി. കുഞ്ഞിനെ യുവതി കൊലപ്പെടുത്തിയതാണോ അതോ പ്രസവത്തിൽ തന്നെ കുഞ്ഞു മരിച്ചിരുന്നോ എന്ന കാര്യം പരിശോധിക്കുന്നതിനിടെയാണ് ഡോക്ടറുടെ മൊഴി. കേസിൽ കുഞ്ഞിന്റെ മാതാവ് ഡോണ ജോജി ആൺ സുഹൃത്ത് തോമസ് ജോസഫ് എന്നിവരെയും കുഞ്ഞിനെ മറവ് ചെയ്യാൻ സഹായിച്ച തോമസിൻ്റെ സുഹൃത്ത് അശോക് ജോസഫിനെയും ആലപ്പുഴ കോടതി ഇന്നലെ റിമാൻഡ് ചെയ്തിരുന്നു. കുഞ്ഞിനെ തോമസിന് കൈമാറുമ്പോൾ ജീവൻ ഉണ്ടായിരുന്നു എന്നാണ് ഡോണയുടെ മൊഴി. എന്നാൽ മൃതദേഹമായിരുന്നു എന്നാണ് തോമസ് നൽകിയ മൊഴി. ഇതിൽ വ്യക്തത വരുത്താനായി പോലീസ് പ്രതികളെ ഒന്നിച്ചിരുത്തി ചോദ്യം ചെയ്യും.

Kerala266 days ago

നെഹ്‌റു ട്രോഫി വള്ളംകളി ഇന്ന്

എഴുപതാമത് നെഹ്‌റു ട്രോഫി വള്ളംകളി ഇന്ന് പുന്നമടക്കായലിൽ. വള്ളംകളി പ്രമാണിച്ച് ആലപ്പുഴ ജില്ലയില്‍ ഇന്ന് ജില്ലാ കളക്ടര്‍ പൊതു അവധി പ്രഖ്യാപിച്ചിട്ടുണ്ട്. ഉച്ചകഴിഞ്ഞ് രണ്ടിനാണ് ഉദ്ഘാടന ചടങ്ങ്. ഉദ്ഘാടന സമ്മേളനത്തില്‍ മന്ത്രിമാര്‍, ജില്ലയിലെ MP മാർ, MLA മാര്‍ തുടങ്ങിയവര്‍ പങ്കെടുക്കും. വയനാട് ഉരുൾപൊട്ടൽ ദുരന്തത്തിന്റെ പശ്ചാത്തലത്തിലാണ് ഓഗസ്റ്റ് 10ന് നടത്താനിരുന്ന വള്ളംകളി ഇന്നത്തേക്ക് മാറ്റിയത്. എന്നാൽ എല്ലാ വര്‍ഷവും സംഘടിപ്പിക്കാറുള്ള വിവിധ പരിപാടികളും, സാംസ്‌കാരിക ഘോഷയാത്രയും, വഞ്ചിപ്പാട്ട് ഉള്‍പ്പെടെയുള്ള മത്സരങ്ങളും ദുരന്തത്തിന്റെ പശ്ചാത്തലത്തില്‍ റദ്ദാക്കിയിരുന്നു. ഒമ്പത് വിഭാഗങ്ങളിലായി 74 വള്ളങ്ങളാണ് മത്സരിക്കുന്നത്. വള്ളംകളിയോടനുബന്ധിച്ച് നഗരത്തിൽ ഗതാഗത നിയന്ത്രണങ്ങൾ ഏർപ്പെടുത്തിയിട്ടുണ്ട്.

Kerala220 days ago

ആലപ്പുഴയില്‍ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും ശനിയാഴ്ച്ച അവധി

നെഹ്റു ട്രോഫി വള്ളംകളിയുടെ പശ്ചാത്തലത്തില്‍ ആലപ്പുഴയിലെ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും 28 ന് ജില്ലാ കളക്ടര്‍ അവധി പ്രഖ്യാപിച്ചു. 28ന് ഉച്ചകഴിഞ്ഞ് രണ്ടിനാണ് 70-ാമത് നെഹ്റു ട്രോഫി വള്ളംകളിയുടെ ഉദ്ഘാടന ചടങ്ങ്. ഇതിനായുളള ഒരുക്കങ്ങള്‍ പൂര്‍ത്തിയായതായും അധികൃതര്‍ അറിയിച്ചു. ഓഗസ്റ്റ് 10ന് നടത്താനിരുന്ന വള്ളംകളി വയനാട് ഉരുള്‍പൊട്ടല്‍ ദുരന്തത്തിന്റെ പശ്ചാത്തലത്തില്‍ സെപ്റ്റംബര്‍ 28 ലേക്ക് മാറ്റുകയായിരുന്നു.

Kerala221 days ago

ആലപ്പുഴ സ്വദേശിയുടെ എംപോക്സ് പരിശോധനാ ഫലം നെഗറ്റീവ്

ആലപ്പുഴയിൽ എംപോക്സ് ലക്ഷണങ്ങളെ തുടർന്ന് വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ച വ്യക്തിയുടെ എംപോക്സ് പരിശോധനാ ഫലം നെഗറ്റീവായി. ബഹ്റൈനിൽ നിന്നെത്തിയ യുവാവിനെയാണ് എംപോക്സ് സംശയത്തെ തുടർന്ന് മെഡിക്കൽ കോളേജിൽ പ്രവേശിപ്പിച്ചത്. ഇദ്ദേഹത്തിന്റെ കുടുംബം ഉൾപ്പെടെ ക്വാറന്‍റൈനില്‍ കഴിയുകയായിരുന്നു. ആരോഗ്യവകുപ്പ് സമ്പർക്കപ്പട്ടികയും തയ്യാറാക്കിയിരുന്നു. നാഷണൽ വൈറോളജി ഇൻസ്റ്റിറ്റ്യൂട്ടിൽ നിന്ന് ലഭിച്ച രണ്ട് പരിശോധനാ ഫലങ്ങളും നെഗറ്റീവ് ആയതോടെ ആലപ്പുഴയിലെ എംപോക്സ്‌ ആശങ്ക ഒഴിഞ്ഞു.

Health224 days ago

ആലപ്പുഴയിലും എംപോക്സ് എന്ന് സംശയം

വിദേശത്തു നിന്നെത്തിയ ആൾക്കാണ് രോഗലക്ഷണങ്ങൾ. ഇയാളെ ആലപ്പുഴ മെഡിക്കൽ കോളേജിൽ പ്രവേശിപ്പിച്ചു. ഇദ്ദേഹത്തിൻ്റെ കുടുംബം ക്വാറന്റീനിലാണ്. അതേസമയം കണ്ണൂരിൽ എംപോക്സ്‌ രോഗ ലക്ഷണങ്ങളെ തുടർന്ന് പരിയാരം മെഡിക്കൽ കോളേജിൽ നിരീക്ഷണത്തിലായിരുന്ന യുവതിയുടെ പരിശോധനാ ഫലം നെഗറ്റീവായി.

Health226 days ago

കാണാതായ എറണാകുളം സ്വദേശിയായ വയോധികയുടെ മൃതദേഹം ആലപ്പുഴയിൽ കുഴിച്ചുമൂടിയ നിലയിൽ കണ്ടെത്തി

എറണാകുളം സ്വദേശി സുഭദ്രയുടെ (73) മൃതദേഹമാണ് ആലപ്പുഴ കോർത്തുശ്ശേരി ക്ഷേത്രത്തിനു സമീപത്തുള്ള വീടിനോടു ചേർന്നു കുഴിച്ചിട്ട നിലയിൽ കണ്ടെത്തിയത്. ഓഗസ്റ്റ് നാലിനാണ് സുഭദ്രയെ കാണാനില്ലെന്ന് മകൻ രാധാകൃഷ്ണൻ കടവന്ത്ര പോലീസിൽ പരാതി നൽകിയത്. കണ്ടെത്തിയ മൃതദേഹം സുഭദ്രയുടേതാണെന്ന് മകൻ തിരിച്ചറിഞ്ഞു. മാത്യൂസ്-ശര്‍മിള ദമ്പതിമാര്‍ വാടകയ്ക്ക് താമസിച്ചിരുന്ന വീടിന്റെ പറമ്പിലാണ് മൃതദേഹം കണ്ടെത്തിയത്. ഇവർ ഒളിവിലാണ്. പോലീസ് നടത്തിയ അന്വേഷണത്തില്‍ സുഭദ്ര അവസാനമെത്തിയത് ആലപ്പുഴ മണ്ണഞ്ചേരി പോലീസ് സ്‌റ്റേഷന്‍ പരിധിയിലാണെന്ന് കണ്ടെത്തി. Read More

Kerala237 days ago

തൃശൂര്‍ റെയില്‍വെ സ്റ്റേഷന്‍ മേല്‍പ്പാലത്തില്‍ നവജാത ശിശുവിന്റെ മൃതദേഹം കണ്ടെത്തി

റെയില്‍വെ സ്റ്റേഷന്റെ മേല്‍പ്പാലത്തിലെ ലിഫ്റ്റിനോട് ചേര്‍ന്നുള്ള ഭാഗത്ത് നിന്നാണ് നവജാത ശിശുവിന്റെ മൃതദേഹം ബാഗിനുള്ളില്‍ കണ്ടെത്തിയത്. സുരക്ഷാ ജീവനക്കാര്‍ ഉപേക്ഷിക്കപ്പെട്ട നിലയില്‍ കണ്ടെത്തിയ ബാഗ് തുറന്ന് പരിശോധിച്ചപ്പോഴാണ് മൃതദേഹം കണ്ടെത്തിയത്. ജനിച്ച് ഒരു ദിവസം മാത്രം പ്രായമായ കുഞ്ഞിന്റെ മൃതദേഹമാണിതെന്നാണ് സംശയം. ആരാണ് ഇവിടെ മൃതദേഹം ഉപേക്ഷിച്ച് പോയതെന്ന് വ്യക്തമല്ല. സംഭവത്തില്‍ പോലീസ് അന്വേഷണം ആരംഭിച്ചു.

Kerala240 days ago

പക്ഷിപ്പനി: 4 ജില്ലകളില്‍ കോഴി, താറാവ് വളര്‍ത്തലിന് നിരോധനം

പക്ഷിപ്പനിയെ തുടര്‍ന്ന് ആലപ്പുഴ, പത്തനംതിട്ട, കോട്ടയം, എറണാകുളം ജില്ലകളിലാണ് കോഴി, താറാവ് വളര്‍ത്തലിന് നിരോധനം ഏര്‍പ്പെടുത്തിയിരിക്കുന്നത്. ആലപ്പുഴ ജില്ലയില്‍ പൂര്‍ണമായും കോഴി, താറാവ് വളര്‍ത്തലിന് നിരോധനം ഏര്‍പ്പെടുത്തിയിട്ടുണ്ട്. പത്തനംതിട്ടയില്‍ 10 ഗ്രാമപഞ്ചായത്തിലും രണ്ട് മുനിസിപ്പാലിറ്റിയിലും കോട്ടയം ജില്ലയിലെ വൈക്കം, ചങ്ങനാശ്ശേരി താലൂക്കുകളിലും എറണാകുളത്തെ നാലു പഞ്ചായത്തുകളിലുമാണ് നിരോധനം ഏര്‍പ്പെടുത്തിയിട്ടുള്ളത്. ഡിസംബര്‍ 31 വരെയാണ് നിരോധനം.

Kerala240 days ago

പക്ഷിപ്പനി: നാലു ജില്ലകളില്‍ നിയന്ത്രണം ഏര്‍പ്പെടുത്തി

പക്ഷിപ്പനി വ്യാപനം തടയാന്‍ നാലു ജില്ലകളില്‍ വളര്‍ത്തുപക്ഷികളുടെ കടത്തലും വിരിയിക്കലും നിരോധിച്ച് സര്‍ക്കാര്‍ ഉത്തരവിറങ്ങി. ഡിസംബര്‍ 31 വരെയാണ് നിയന്ത്രണം. ആലപ്പുഴ ജില്ലയില്‍ പൂര്‍ണമായും കോട്ടയം, പത്തനംതിട്ട, എറണാകുളം ജില്ലകളിലെ രോഗബാധിത മേഖലയിലുമാണ് നിയന്ത്രണമുളളത്. നിയന്ത്രണമേഖലയിലേക്ക് പക്ഷികളെയും (കോഴി, താറാവ്, കാട) കുഞ്ഞുങ്ങളെയും കൊണ്ടുവരാനോ കൊണ്ടുപോകാനോ പാടില്ല. ഇപ്പോള്‍ ഈ പ്രദേശങ്ങളിലെ ഹാച്ചറികളിലുള്ള മുട്ടകള്‍ ശാസ്ത്രീയമായി നശിപ്പിക്കണം. ഇനിയൊരു ഉത്തരവുണ്ടാകുന്നതുവരെ ഹാച്ചറികളില്‍ മുട്ട വിരിയിക്കാന്‍ പാടില്ലെന്നും ഉത്തരവില്‍ പറയുന്നു.

Kerala242 days ago

ചേര്‍ത്തല കൊലപാതകം; നവജാത ശിശുവിന്റെ മൃതദേഹം കണ്ടെത്തി

ആലപ്പുഴ ചേര്‍ത്തലയില്‍ അമ്മയും സുഹൃത്തും ചേര്‍ന്ന് ശ്വാസം മുട്ടിച്ച് കൊലപ്പെടുത്തിയ നവജാതശിശുവിന്റെ മൃതദേഹം കണ്ടെത്തി. കുഞ്ഞിന്റെ അമ്മ ആശയുടെ സുഹൃത്തായ രതീഷിന്റെ വീട്ടിലെ ശുചിമുറിയില്‍ നിന്നാണ് ആണ്‍കുട്ടിയുടെ മൃതദേഹം കണ്ടെത്തിയത്. പ്രസവത്തിന് പിന്നാലെ നവജാത ശിശുവിനെ കൊലപ്പെടുത്തിയതാണെന്ന് അമ്മ ആശയും ആണ്‍ സുഹൃത്ത് രതീഷും ചോദ്യം ചെയ്യലില്‍ സ്ഥിരീകരിച്ചിരുന്നു. ഇന്‍ക്വസ്റ്റ് നടപടികള്‍ പൂര്‍ത്തിയാക്കിയതായും പോലീസ് പറഞ്ഞു.

Kerala245 days ago

ചേര്‍ത്തലയിലെ നവജാതശിശുവിനെ ശ്വാസം മുട്ടിച്ച് കൊലപ്പെടുത്തിയത്; പ്രതികള്‍ കുറ്റം സമ്മതിച്ചു

ആലപ്പുഴ ചേര്‍ത്തലയില്‍ നവജാതശിശുവിനെ അമ്മയും സുഹൃത്തും ചേര്‍ന്ന് ശ്വാസം മുട്ടിച്ച് കൊലപ്പെടുത്തി. സംഭവത്തില്‍ കുഞ്ഞിന്റെ അമ്മ ആശയേയും സുഹൃത്ത് രതീഷിനെയും പോലീസ് കസ്റ്റഡിയിലെടുത്തു. കുഞ്ഞിനെ രതീഷിന്റെ വീട്ടിലാണ് കുഴിച്ചുമൂടിയതെന്നും പ്രതികള്‍ വെളിപ്പെടുത്തി. കുഞ്ഞിനെ അടക്കം ചെയ്ത സ്ഥലത്ത് പോലീസ് തെരച്ചില്‍ നടത്തും. ആദ്യം കുഞ്ഞിനെ തൃപ്പൂണിത്തുറ സ്വദേശികള്‍ക്ക് കൈമാറിയെന്നായിരുന്നു ഇവരുടെ മൊഴി. കൂടുതല്‍ ചോദ്യം ചെയ്തതോടെയാണ് കൊലപാതക വിവരം പുറത്തറിഞ്ഞത്.

Kerala245 days ago