സമരം ചെയ്യുന്ന ഡോക്ടര്‍മാരുമായി കൂടിക്കാഴ്ച്ച നടത്തി മമത ബാനര്‍ജി

കൊല്‍ക്കത്തയിലെ ആര്‍ജി കര്‍ ആശുപത്രിയിലെ വനിതാ ഡോക്ടര്‍ ബലാത്സംഗത്തിനിരയായി കൊല്ലപ്പെട്ടതിന് പിന്നാലെ പ്രതിഷേധ സമരം നടത്തുന്ന ജൂനിയര്‍ ഡോക്ടര്‍മാരുമായി പശ്ചിമ ബംഗാള്‍ മുഖ്യമന്ത്രി മമത ബാനര്‍ജി കൂടിക്കാഴ്ച്ച നടത്തി. ഡോക്ടര്‍മാരുടെ ആവശ്യങ്ങള്‍ പരിശോധിക്കുമെന്നും കൊലപാതക കേസിലെ കുറ്റക്കാര്‍ക്കെതിരെ കര്‍ശന നടപടിയെടുക്കുമെന്നും മുഖ്യമന്ത്രി അവര്‍ക്ക് ഉറപ്പ് നല്‍കി. മുഖ്യമന്ത്രി എന്ന നിലയിലല്ല സഹോദരിയായാണ് നിങ്ങളെ കാണാന്‍ വന്നതെന്നും നിങ്ങളുടെ ആവശ്യങ്ങള്‍ നിറവേറ്റുമെന്ന് ഉറപ്പ് നല്‍കുന്നതായും മമത പറഞ്ഞു.

National231 days ago

ബംഗാളിലെ വെള്ളപ്പൊക്കം; പ്രധാനമന്ത്രിയ്ക്ക് കത്തയച്ച് മമത ബാനര്‍ജി

പശ്ചിമ ബംഗാളില്‍ പ്രളയം മൂലമുണ്ടായ വ്യാപക നാശനഷ്ടങ്ങള്‍ പരിഹരിക്കാന്‍ ഉടന്‍ കേന്ദ്ര ഫണ്ട് അനുവദിക്കണമെന്നാണ് മുഖ്യമന്ത്രി മമത ബാനര്‍ജി പ്രധാനമന്ത്രി മോദിക്ക് അയച്ച കത്തില്‍ ആവശ്യപ്പെട്ടിരിക്കുന്നത്. ലോവര്‍ ദാമോദറിലും സമീപ പ്രദേശങ്ങളിലും 2009 ന് ശേഷമുള്ള ഏറ്റവും വലിയ വെള്ളപ്പൊക്കമാണ് സംസ്ഥാനം ഇപ്പോള്‍ അഭിമുഖീകരിക്കുന്നത്. ഈ വിഷയം ഗൗരവമായി പരിഗണിക്കണം. ദുരന്തബാധിതരെ സഹായിക്കാന്‍ കേന്ദ്ര ഫണ്ട് അനുവദിക്കണമെന്നും മമത കത്തില്‍ സൂചിപ്പിച്ചു. അതേസമയം ദാമോദര്‍ വാലി കോര്‍പറേഷന്‍ 5.5 ലക്ഷം കുസെക്‌സ് വെള്ളം തുറന്നുവിട്ടതാണ് തെക്കന്‍ ബംഗാളില്‍ വെള്ളപ്പൊക്കത്തിന് കാരണമായതെന്നാണ് മമതയുടെ ആരോപണം.

National225 days ago

ആർജി. കർ മെഡിക്കൽ കോളേജിലെ മുൻ പ്രിന്‍സിപ്പൽ സന്ദീപ് ഘോഷിന്റെ രജിസ്‌ട്രേഷൻ റദ്ദാക്കി

യുവ വനിതാ ഡോക്ടര്‍ ബലാത്സംഗത്തിന് ഇരയായി കൊല്ലപ്പെട്ട കൊല്‍ക്കത്തയിലെ ആര്‍ജി. കര്‍ മെഡിക്കല്‍ കോളേജിലെ മുന്‍ പ്രിന്‍സിപ്പല്‍ സന്ദീപ് ഘോഷിന്റെ ഡോക്ടര്‍ രജിസ്‌ട്രേഷന്‍ പശ്ചിമ ബംഗാള്‍ മെഡിക്കല്‍ കൗണ്‍സിൽ റദ്ദാക്കി. ഡോക്ടറുടെ കൊലപാതകവുമായി ബന്ധപ്പെട്ടും സാമ്പത്തിക ക്രമക്കേടുകളിലും സന്ദീപ് ഘോഷ് CBI കസ്റ്റഡിയിൽ തുടരുന്നതിനിടെയാണ് നടപടി. രജിസ്‌ട്രേഷന്‍ റദ്ദാക്കിയതോടെ സന്ദീപ് ഘോഷിന് ഇനി മുതൽ ആരെയും ചികിത്സി അവകാശമുണ്ടാകില്ല. രജിസ്ട്രേഷൻ റദ്ദാക്കുന്നതിന് മുന്നോടിയായി ഇന്ത്യൻ മെഡിക്കൽ അസോസിയേഷന്റെ ബംഗാൾ ഘടകം സന്ദീപ് ഘോഷിന് കാരണം കാണിക്കൽ നോട്ടീസ് നൽകിയിരുന്നു. എന്നാല്‍ ഘോഷ് നോട്ടീസിന് മറുപടി നൽകിയില്ല. തുടര്‍ന്നാണ് നടപടി.

National225 days ago

മനോജ് കുമാര്‍ വര്‍മ പുതിയ കൊല്‍ക്കത്ത പോലീസ് കമ്മിഷണർ

വിനീത് ഗോയലിന് പകരക്കാരനായി പുതിയ കൊല്‍ക്കത്ത പോലീസ് കമ്മിഷണറായി മനോജ് കുമാര്‍ വര്‍മയെ പശ്ചിമ ബംഗാൾ സർക്കാർ നിയമിച്ചു. ആര്‍ജി. കര്‍ മെഡിക്കല്‍ കോളേജിലെ വനിതാ ഡോക്ടര്‍ ബലാത്സംഗത്തിനിരയായി കൊല്ലപ്പെട്ട സംഭവം കൈകാര്യം ചെയ്തതിൽ വിനീത് ഗോയലിന് ഗരുതരമായ വീഴ്ച സംഭവിച്ചുവെന്ന് ആരോപണം ഉയർന്നതിനെ തുടർന്നാണ് പശ്ചിമ ബംഗാൾ സർക്കാർ അദ്ദേഹത്തെ കൊല്‍ക്കത്ത പോലീസ് കമ്മിഷണർ സ്ഥാനത്ത് നിന്ന് നീക്കിയത്.

National228 days ago

യുവ ഡോക്ടറുടെ കൊലപാതകം; വിക്കീപീഡിയയില്‍ നിന്ന് ഇരയുടെ പേര് നീക്കണമെന്ന് സുപ്രീംകോടതി

കൊല്‍ക്കത്തയിലെ ആര്‍ജി കര്‍ മെഡിക്കല്‍ കോളേജിലെ യുവ ഡോക്ടറെ ബലാത്സംഗം ചെയ്ത് കൊലപ്പെടുത്തിയ കേസില്‍ ഇരയുടെ പേര് പ്രസിദ്ധീകരിച്ച വിക്കിപീഡിയയോട് അത് നീക്കം ചെയ്യാന്‍ ആവശ്യപ്പെട്ട് സുപ്രീംകോടതി. കേസുമായി ബന്ധപ്പെട്ട് നടന്നുകൊണ്ടിരിക്കുന്ന അന്വേഷണത്തെക്കുറിച്ചുള്ള CBI സ്റ്റാറ്റസ് റിപ്പോര്‍ട്ട് മോശമെന്നും സുപ്രീംകോടതി പറഞ്ഞു. റിപ്പോര്‍ട്ടില്‍ CBI വെളിപ്പെടുത്തിയ കാര്യങ്ങള്‍ മോശമാണെന്ന് പറഞ്ഞ ചീഫ് ജസ്റ്റിസ് ഡി. വൈ. ചന്ദ്രചൂഡ് അതിന്റെ കണ്ടെത്തലുകള്‍ കോടതിയെ വളരെയധികം അസ്വസ്ഥമാക്കിയെന്നും വ്യക്തമാക്കി.

National228 days ago

യുവ ഡോക്ടറുടെ മരണം; ഡോക്ടര്‍മാരുടെ ആവശ്യങ്ങള്‍ അംഗീകരിച്ച് മമതാ ബാനര്‍ജി

കൊല്‍ക്കത്തയിലെ ആര്‍ജി കര്‍ മെഡിക്കല്‍ കോളജിലെ യുവ ഡോക്ടര്‍ ബലാത്സംഗത്തിന് ഇരയായി കൊല്ലപ്പെട്ട സംഭവത്തില്‍ സമരം തുടരുന്ന ജൂനിയര്‍ ഡോക്ടര്‍മാരുടെ ആവശ്യങ്ങള്‍ മമത ബാനര്‍ജി അംഗീകരിച്ചു. സമരക്കാര്‍ മുന്നോട്ടുവെച്ച അഞ്ച് ആവശ്യങ്ങളില്‍ മൂന്നെണ്ണമാണ് അംഗീകരിച്ചത്. ആരോഗ്യ വകുപ്പ് ഡയറക്ടറേയും ആരോഗ്യ വിദ്യാഭ്യാസ ഡയറക്ടറേയും മാറ്റി. കൊല്‍ക്കത്ത പോലീസ് കമ്മീഷണര്‍ വിനീത് ഗോയലിനേയും മാറ്റും.

National228 days ago

ഡോക്ടർമാരെ വീണ്ടും ചർച്ചയ്ക്കു വിളിച്ച് മമത ബാനർജി

ആർജി.കർ മെഡിക്കൽ കോളേജ് ആശുപത്രിയിൽ വനിതാ ഡോക്ടർ പീഡനത്തിനിരയായി കൊല്ലപ്പെട്ട സംഭവത്തിൽ പ്രതിഷേധിക്കുന്ന ഡോക്ടർമാരെ പശ്ചിമ ബംഗാൾ മുഖ്യമന്ത്രി മമത ബാനർജി വീണ്ടും ചർച്ചയ്ക്ക് വിളിച്ചു. ഇത് അഞ്ചാം തവണയാണ് മമത ബാനർജി പ്രതിഷേധിക്കുന്ന ഡോക്ടർമാരെ ചർച്ചയ്ക്ക് വിളിക്കുന്നത്. മമത ബാനർജിയുടെ ക്ഷണം സ്വീകരിക്കണമോ എന്ന് പ്രതിഷേധിക്കുന്ന ഡോക്ടർമാർ ഇന്ന് ചേരുന്ന ജനറൽ ബോഡി യോഗത്തിന് ശേഷം തീരുമാനിക്കും. കോൽക്കത്തയിലെ കാളിഘട്ടിലെ വസതിയിലേക്ക് വൈകിട്ട് 4:45 നാണ് മമത ബാനർജി ഡോക്ടർമാരെ ചർച്ചയ്ക്ക് വിളിച്ചിരിക്കുന്നത്.

National229 days ago

മമത ബാനർജിയുമായി പൊതുവേദി പങ്കിടില്ല: ബംഗാൾ ഗവർണർ

കൊൽക്കത്തയിൽ ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ പ്രതിഷേധം തുടരുന്നതിനിടെ പശ്ചിമ ബംഗാൾ ഗവർണർ സി.വി. ആനന്ദ ബോസ് മുഖ്യമന്ത്രി മമത ബാനർജിയുമായി പൊതുവേദി പങ്കിടില്ലെന്ന് വ്യക്തമാക്കി. ബംഗാൾ സമൂഹത്തോട് ഐക്യദാർഢ്യം പ്രഖ്യാപിച്ച് താൻ മുഖ്യമന്ത്രിയെ സാമൂഹികമായി ബഹിഷ്കരിക്കുകയാണെന്നും മുഖ്യമന്ത്രിയുമായി ഒരു പൊതുവേദി പങ്കിടുകയോ മുഖ്യമന്ത്രി ഉൾപ്പെടുന്ന ഒരു പൊതുപരിപാടിയിൽ പങ്കെടുക്കുകയോ ചെയ്യില്ലെന്നും ഗവർണർ പറഞ്ഞു.

National232 days ago

ഡോക്ടർമാരുടെ സമരം തുടരുന്നതോടെ രാജിസന്നദ്ധത അറിയിച്ച് മമത ബാനർജി

ആർജി. കർ മെഡിക്കൽ കോളജിലെ വനിതാ ഡോക്ടർ ബലാൽസംഗത്തിന് ഇരയായി കൊല്ലപ്പെട്ടതിൽ പ്രതിഷേധം ശക്തമാകവേ, മുഖ്യമന്ത്രി പദവി ഒഴിയാൻ തയാറാണെന്ന് പ്രഖ്യാപിച്ച് പശ്ചിമ ബംഗാൾ മുഖ്യമന്ത്രി മമത ബാനർജി. സമരം പരിഹരിക്കുന്നതിനായി മുഖ്യമന്ത്രിയുമായി ഇന്ന് നടക്കാനിരുന്ന ചർച്ച തത്സമയം സംപ്രേക്ഷണം ചെയ്യണം എന്നായിരുന്നു ഡോക്ടർമാരുടെ ആവശ്യം. എന്നാൽ ഈ ആവശ്യം സർക്കാർ അംഗീകരിക്കാത്തതിനെ തുടർന്ന് ഡോക്ടർമാർ ചർച്ചയ്ക്ക് എത്തിയില്ല. ഡോക്ടർമാരുമായുള്ള ചർച്ച മുടങ്ങിയതിനു പിന്നാലെ നടത്തിയ വാർത്താ സമ്മേളനത്തിലാണു മമതയുടെ പ്രതികരണം. ആര്‍ജി. കര്‍ ആശുപത്രിയില്‍ കൊല്ലപ്പെട്ട ഡോക്ടര്‍ക്ക് നീതി ഉറപ്പാക്കുകതന്നെയാണ് തന്‍റെയും ആവശ്യമെന്നും മമത പറഞ്ഞു.

National232 days ago

ഡോക്ടറുടെ ബലാത്സംഗ കൊലപാതകക്കേസ്; ജോലിയില്‍ പ്രവേശിക്കില്ലെന്ന് ഡോക്ടര്‍മാര്‍

സെപ്റ്റംബര്‍ 10 ചൊവ്വാഴ്ച വൈകുന്നേരം അഞ്ച് മണിക്കകം ജോലി പുനരാരംഭിക്കണമെന്ന സുപ്രീംകോടതി ഉത്തരവ് ലംഘിക്കുമെന്ന് പ്രതിഷേധിക്കുന്ന ജൂനിയര്‍ ഡോക്ടര്‍മാര്‍ അറിയിച്ചു. ജോലിയില്‍ പ്രവേശിച്ചില്ലെങ്കില്‍ അച്ചടക്ക നടപടി സ്വീകരിക്കാന്‍ സര്‍ക്കാരിന് അധികാരം നല്‍കുമെന്ന് സുപ്രീംകോടതി അറിയിച്ചിരുന്നു. അതേസമയം സംസ്ഥാന ആരോഗ്യ സെക്രട്ടറിയുടെയും ആരോഗ്യ വിദ്യാഭ്യാസ ഡയറക്ടറുടെയും രാജി ആവശ്യപ്പെട്ട് ഇന്ന് ഉച്ചയ്ക്ക് ആരോഗ്യവകുപ്പിന്റെ ആസ്ഥാനമായ സ്വസ്ത്യഭവനിലേക്ക് മാര്‍ച്ച് നടത്തുമെന്ന് ഡോക്ടര്‍മാര്‍ അറിയിച്ചു. Read More

National235 days ago

വനിതാ ഡോക്ടറുടെ കൊലപാതകം: പ്രതിഷേധിക്കുന്ന ഡോക്ടർമാർ ജോലിയിൽ പ്രവേശിക്കണമെന്ന് സുപ്രീംകോടതി

കൊൽക്കത്തയിലെ ആർജി കാർ മെഡിക്കൽ കോളജ് ആശുപത്രിയിൽ യുവ വനിതാ ഡോക്ടർ ബലാത്സംഗത്തിനിരയായി കൊല്ലപ്പെട്ട സംഭവത്തില്‍ പ്രതിഷേധിക്കുന്ന ഡോക്ടർമാർ നാളെ വൈകിട്ട് അഞ്ചിനകം ജോലിയിൽ പ്രവേശിക്കണം. അല്ലാത്തപക്ഷം അച്ചടക്ക നടപടി സ്വീകരിക്കാൻ സർക്കാരിന് നിർദേശം നൽകുമെന്ന് സുപ്രീംകോടതി പറഞ്ഞു. വനിതാ ഡോക്ടറുടെ കൊലപാതകവുമായി ബന്ധപ്പെട്ട് സ്വമേധയാ എടുത്ത കേസിന്റെ വാദം കേൾക്കുകയായിരുന്നു ചീഫ് ജസ്റ്റിസ് ഡി.വൈ. ചന്ദ്രചൂഡിൻ്റെ നേതൃത്വത്തിലുള്ള മൂന്നംഗ ബെഞ്ച്. Read More

National236 days ago